Khmer |
 |
 |
|
Villa Maria Society គឺជាអង្គការមិនរកប្រាក់ចំណេញ និងផ្ដោតទៅលើគុណតម្លៃដោយផ្ដល់ជូននូវសេវាផ្សេងៗដែលមានគុណភាព និងឱកាសជាច្រើនដែលធ្វើឲ្យជីវិតកាន់តែប្រសើរសម្រាប់ជនវ័យចំណាស់ និងកុមារ រួមទាំងមនុស្សចាស់ធំពេញវ័យដែលមានពិការភាព។ ទស្សនវិស័យរបស់យើងគឺ “បង្កើតជម្រើសឲ្យបានច្រើន និងកសាងសហគមន៍ដែលមានករុណាធម៌, និរន្ដរភាព និងសម្រាប់មនុស្សទាំងឡាយដោយមិនរើសអើង”។ សេវាសម្រាប់ជនមានពិការភាព - ក្រុមអ្នកផ្ដល់សេវាសម្រាប់ជនមានពិការភាពរបស់អង្គការ Villa Maria គឺជាក្រុមដែលមានចំណូលចិត្ដខ្ពស់អំពីការជួយគាំទ្រដល់បណ្ដាជនដែលមានពិការភាពដើម្បីឲ្យគេសម្រេចគោលដៅ និងសុបិន្ដផ្ទាល់ខ្លួនរបស់ពួកគេ។ បុគ្គលិកអង្គការផ្ដល់លទ្ធភាព, ការគាំទ្រ និងជំរុញលើកទឹកចិត្ដឲ្យបណ្ដាជនចូលរួមពេញលេញ និងដោយស្មើភាពនៅក្នុងសហគមន៍ ដោយបង្កើតឲ្យមាននូវជម្រើសមាគ៌ា និងឱកាសជាច្រើនសម្រាប់ពួកគេជ្រើសរើស។ សេវាជាច្រើនរបស់យើងរួមមានកន្លែងស្នាក់នៅរួមដែលមានការគាំទ្រ, កន្លែងសម្រាប់សម្រាកបណ្ដោះអាសន្នដែលមានលក្ខណៈងាយស្រួលបត់បែន, ជម្រើសកម្សាន្ដផ្សេងៗនៅពេលថ្ងៃសម្រាប់មនុស្សពេញវ័យ, ការគាំទ្រសម្រាប់បុគ្គលម្នាក់ៗ, ការចាត់ចែងករណីសំណុំរឿង និងការគាំទ្រដល់អ្នកមើលថែទាំមនុស្សចាស់។ ចំពោះការសាកសួរសំណួរផ្សេងៗ សូមទូរស័ព្ទទៅលេខ (03) 9855 7616 ឬ (03) 9855 7618 ។
សេវាអប់រំ - អង្គការ Villa Maria ផ្ដល់ការគាំទ្រដល់កុមារដែលមានពិការភាព និងការយឺតយ៉ាវក្នុងការវិវឌ្ឍ។ អង្គការ Villa Maria សហការជាមួយនឹងក្រុមគ្រួសារនានា ដើម្បីធានាឲ្យបានថា កុមារនីមួយៗមានលទ្ធភាពអាចទទួលបាននូវសេវាអប់រំ, កម្មវិធីព្យាបាល និងអភិវឌ្ឍន៍យ៉ាងទូលំទូលាយ ដើម្បីផ្ដល់លទ្ធភាពឲ្យពួកគេអភិវឌ្ឍពង្រឹងសក្ដានុពលភាពឲ្យបានពេញលេញដែលអាចធ្វើទៅបានផ្នែកបញ្ញាស្មារតី ក៏ដូចជាកម្លាំងកាយ និងកម្លាំងផ្លូវចិត្ដផងដែរ។ សេវាធ្វើអន្ដរាគមន៍មុនវ័យកុមារភាព (Early Childhood Intervention Service) របស់យើង ផ្ដល់ការគាំទ្រដល់កុមារពីពេលទើបកើត ដល់អាយុ៦ឆ្នាំ។ សាលារៀន St Paul’s College ផ្ដល់កម្មវិធីផ្សារភ្ជាប់ទំនាក់ទំនងដល់កុមារសាលាមត្ដេយ្យ និងការសិក្សារៀនសូត្រសម្រាប់ក្មេងពីអាយុ៥ឆ្នាំ ដល់១៨ឆ្នាំ ដោយពួកគេអាចទទួលបាននូវការគាំទ្រជាលក្ខណៈបុគ្គលយ៉ាងច្រើនសន្ធឹកសន្ធាប់ ដើម្បីរៀបចំខ្លួនគេសម្រាប់ជីវិតមនុស្សធំពេញវ័យ។ ចំពោះការសាកសួរសំណួរផ្សេងៗអំពីសេវាធ្វើអន្ដរាគមន៍មុនវ័យកុមារភាព (Early Childhood Intervention Service) សូមទូរស័ព្ទទៅលេខ (03) 9855 7850។ ចំពោះការសាកសួរសំណួរផ្សេងៗអំពីសាលារៀន St Paul’s College សូមទូរស័ព្ទលេខ (03) 9855 7700។
សេវាសហគមន៍ - សេវាសហគមន៍ជាច្រើនប្រភេទរបស់អង្គការ Villa Maria ជួយដល់មនុស្សវ័យចំណាស់ និងអ្នកថែទាំងរបស់គេឲ្យនៅមានភាពសកម្មបាន និងភ្ជាប់ទំនាក់ទំនងជាមួយនឹងសហគមន៍របស់ពួកគេ។ សេវានានាដំណើរការនៅក្នុងរង្វង់ទីក្រុងមែលប៊ន (MetropolitanMelbourne), តាមតំបន់ផ្សេងៗនៃរដ្ឋវិចថូរិយ៉ា (Regional Victoria) និងតំបន់ Southern Riverina នៃរដ្ឋ New South Wales ។ កម្មវិធីជាក់លាក់ផ្សេងៗទៀតសម្រាប់ជនវ័យចំណាស់រួមមានកម្មវិធីដែលមានការផ្ដល់ថវិកាពីរដ្ឋាភិបាលសហព័ន្ធសម្រាប់ការថែទាំមនុស្សចាស់ៗដូចជាកម្មវិធី CACP, EACH និង EACH Dementia, កម្មវិធីគាំទ្រអ្នកថែទាំ ដែលក្នុងនោះមានកម្មវិធីអ្នកថែទាំមនុស្សវ័យក្មេង, កម្មវិធីអ្នកថែទាំសុខភាពផ្លូវចិត្ដ និងអ្នកថែទាំងជនដទៃទៀតដែលមានពិការភាពធ្ងន់ធ្ងរ។ ក្រៅពីនោះក៏មានកម្មវិធីសម្រាកបណ្ដោះអាសន្នរយៈពេលយប់ និងថ្ងៃ និងសេវាស្ដារកាយ និងនិតិសម្បទា និងការគាំទ្រផ្នែកផ្ទះសម្បែងស្នាក់នៅផងដែរ។ ចំពោះការសាកសួរសំណួរផ្សេងៗ សូមទូរស័ព្ទលេខ 1300 650 615។
សេវាថែទាំមនុស្សចាស់តាមផ្ទះ - អង្គការ Villa Maria មានកន្លែងផ្ដល់ការថែទាំមនុស្សចាស់តាមផ្ទះចំនួន៤កន្លែង ដែលស្ថិតនៅសង្កាត់ Prahran, សង្កាត់ Berwick, សង្កាត់ Bundoora និងសង្កាត់ Wantirna*។ កន្លែងថែទាំមនុស្សចាស់តាមផ្ទះរបស់យើងបានការទទួលស្គាល់ពេញលេញ ដោយផ្ដល់ឲ្យអ្នកស្នាក់នៅនូវការថែទាំដែលមានស្ដង់ដារខ្ពស់បំផុតដែលអាចធ្វើទៅបាន។ ការគាំទ្រចំពោះតម្រូវការផ្នែកសង្គម និងវប្បធម៌ចម្រុះរបស់អ្នកស្នាក់នៅ, ការជួយសម្រួលដល់ទំនាក់ទំនងវិជ្ជមាន និងការបង្កើតឱកាសផ្សេងៗសម្រាប់អ្នកស្នាក់នៅដើម្បីបានសប្បាយរីករាយនឹងសកម្មភាព និងមិត្ដភាពរបស់សហគមន៍ គឺជាគោលការណ៍សំខាន់នៃចំណាត់ការរបស់អង្គការ Villa Maria ក្នុងការផ្ដល់សេវាថែទាំមនុស្សចាស់តាមផ្ទះ។ ចំពោះការសាកសួរសំណួរផ្សេងៗ សូមទូរស័ព្ទលេខ 1300 845 525។
*សូមកត់សម្គាល់ថា កន្លែងសេវាថែទាំមនុស្សចាស់តាមផ្ទះនៅសង្កាត់ Wantirna បច្ចុប្បន្នកំពុងបិទទ្វារដើម្បីធ្វើការអភិវឌ្ឍឡើងវិញ។
ការរស់នៅដោយឯករាជ្យសម្រាប់មនុស្សចាស់។ អង្គការ Villa Maria មានជម្រើស២សម្រាប់ការរស់នៅឯករាជ្យ ដែលមានជូនសម្រាប់មនុស្សចាស់ៗ។
ភូមិគ្រឹះ Athelstan Camberwell គឺជាភូមិគ្រឹះចូលនិវត្ដន៍ដែលបច្ចុប្បន្នកំពុងស្ថិតនៅក្នុងការសាងសង់នៅឡើយ ហើយត្រូវចប់រួចរាល់ជាស្ថាពរនៅពាក់កណ្ដាលឆ្នាំ២០១២។ នៅពេលសង់រួច អ្នកស្នាក់នៅនឹងរីករាយពេញចិត្ដទៅនឹងស្ដង់ដារថ្មីប្រណិតសម្រាប់ការរស់នៅឯករាជ្យនៅក្នុងផ្ទះ apartment ប្រកបដោយសេចក្ដីសុខ និងស្ថិតនៅតំបន់ដែលជិតកន្លែងល្អៗជាច្រើនដូចជាតំបន់ផ្សារលក់ទំនិញលើផ្លូវ Burke Rd, រោងភាពយន្ដ Rivoli, ភោជនីយដ្ឋាន, សួនឧទ្យាន និងកន្លែងធ្វើលំហាត់ប្រាណ និងកន្លែងសប្បាយជាច្រើនទៀតដែលទាំងអស់នេះសុទ្ធតែនៅជិតកន្លែងធ្វើដំណើរសាធារណៈ។ ចំពោះការសាកសួរសំណួរផ្សេងៗ សូមទូរស័ព្ទទៅលេខ (03) 9882 5800។
ផ្ទះ unit សម្រាប់ការរស់នៅដោយឯករាជ្យត្រូវបានសាងសង់ឡើង និងចាត់ចែងដោយការិយាល័យទទួលបន្ទុកកិច្ចការផ្ទះសម្បែង (Office of Housing) ដែលមានទីតាំងនៅក្នុងសង្កាត់ Wantirna និង Bundoora។ អ្នកស្នាក់នៅត្រូវតែទទួលការវាយតម្លៃពីការិយាល័យទទួលបន្ទុកកិច្ចការផ្ទះសម្បែងនេះជាមុនសិន ថាតើគេមានសិទ្ធិទទួលការអនុញ្ញាតឲ្យរស់នៅផ្ទះរដ្ឋ ឬយ៉ាងណា។ អង្គការ Villa Maria រក្សាសិទ្ធិនៃភាពជាអ្នកគាំទ្រសម្រាប់ការទទួលយកមនុស្សឲ្យទៅរស់នៅក្នុងផ្ទះunit សម្រាប់ការរស់នៅដោយឯករាជ្យ។ ចំពោះការសាកសួរសំណួរផ្សេងៗ សូមទូរស័ព្ទទៅលេខ (03) 9855 7600។
ឱកាសសម្រាប់ការងារស្ម័គ្រចិត្ដ។ អង្គការ Villa Maria ត្រូវបានបង្កើតឡើងដោយអ្នកស្ម័គ្រចិត្ដជាច្រើននាក់នៅឆ្នាំ១៩០៧ ហើយសព្វថ្ងៃនេះបណ្ដាអ្នកស្ម័គ្រចិត្ដនៅតែដើរតួនាទីយ៉ាងសំខាន់នៅក្នុងការសម្រេចបាននូវទស្សនវិស័យរបស់យើងក្នុងការបង្កើតជម្រើសឲ្យបានច្រើន និងកសាងសហគមន៍ដែលមានករុណាធម៌, និរន្ដរភាព និងសម្រាប់មនុស្សទាំងឡាយដោយមិនរើសអើង។ អង្គការ Villa Maria មានការពេញចិត្ដរីករាយដែលបានការគាំទ្រពីអ្នកស័្មគ្រចិត្ដជាង៣០០នាក់។
ការស្ម័គ្រចិត្ដទៅបម្រើការងារនៅអង្គការ Villa Maria គឺជាឱកាសមួយសម្រាប់ការចូលរួមនៅក្នុងសហគមន៍របស់អ្នក, ចែករំលែកជំនាញការងារ, ភ្ជាប់ទំនាក់ទំនងជាមួយនឹងមនុស្សដែលមានទឹកចិត្ដដូចគ្នា និងដើម្បីធ្វើការផ្លាស់ប្ដូរពិតប្រាកដដល់ជីវិតមនុស្សឲ្យកាន់តែប្រសើរឡើង។ លោកអ្នកក៏អាចអភិវឌ្ឍជំនាញការងារថ្មីៗបានផងដែរ ហើយក្រៅពីនេះក៏ទទួលបាននូវបទពិសោធន៍ដ៏មានតម្លៃ, ស្ថាបនាទំនុកចិត្ដផ្ទាល់ខ្លួនរបស់អ្នក និងរីករាយនឹងជីវិត!
ចំពោះការសាកសួរសំណួរផ្សេងៗ សូមទូរស័ព្ទទៅលេខ (03) 9855 7755។
ឱកាសសម្រាប់ការគាំទ្រ។ សមត្ថភាពរបស់អង្គការ Villa Mariaក្នុងការមាននិរន្ដរភាព និងធ្វើឲ្យសេវាផ្សេងៗរីកចម្រើនលូតលាស់ គឺអាចធ្វើទៅបានក៏ដោយសារតែតាមរយៈការប្ដេជ្ញាចិត្ដ និងការគាំទ្រពីសំណាក់សហគមន៍។ អង្គការ Villa Mariaស្វាគមន៍ជានិច្ចចំពោះការចូលវិភាគទាន ទោះតិចក្ដីច្រើនក្ដី។ លោកអ្នកអាចបរិច្ចាគវិភាគទានមួយលើកក៏បាន, ក្លាយជាអ្នកផ្ដល់ជំនួយទៀងទាត់, គាំទ្រដល់ការអំពាវនាវរបស់យើងបច្ចុប្បន្ន, ទុកបណ្ដាំកេររបស់អ្នក ឬក៏ក្លាយជាអ្នកគាំទ្រពីសំណាក់ក្រុមហ៊ុនឯកជនក៏បាន។ ដើម្បីបានព័ត៌មានបន្ថែមអំពីវិធីដែលលោកអ្នកអាចជួយផ្លាស់ប្ដូរជីវិតមនុស្សឲ្យប្រសើរឡើង សូមទូរស័ព្ទទៅលេខ (03) 9855 7641។
ប្រសិនបើអ្នកត្រូវការជំនួយអ្នកបកប្រែភាសា, សូមទូរស័ព្ទទៅសេវាបកប្រែភាសា Translating and Interpreting Service (TIS) ដែលមានបម្រើជូន២៤ម៉ោងទូទាំងប្រទេសតាមលេខ 13 14 50 ដោយគេគិតតម្លៃទូរស័ព្ទតែក្នុងតំបន់ប៉ុណ្ណោះ ហើយស្នើសុំឲ្យគេភ្ជាប់ទៅលេខទូរស័ព្ទណាមួយនៃលេខទូរស័ព្ទនានាដែលមានផ្ដល់ជូនខាងលើ ហើយគេនឹងទាក់ទងយើងខ្ញុំសម្រាប់លោកអ្នក។
អ៊ីមែល៖ villamaria@villamaria.com.au
វ៉ិបសាយថ៍៖ www.villamaria.com.au
|
VILLA TWEET
Follow the latest Villa Maria tweets.
By A Web Design Company STAY SOCIAL
Join the Villa conversation.
|
 |
